Орталық Азия атынан: inVision U Duke University қолдауымен құрылған Future Universities Alliance құрамына қосылды

‍

inVision U жоғары білім берудегі озық тәжірибелермен алмасу мен халықаралық ынтымақтастықты дамыту мақсатында Duke University жанынан құрылған Future Universities Alliance халықаралық альянсының Innovation Sandbox бағдарламасының алғашқы қатысушыларының қатарына қосылды.

‍

Бағдарламаның алғашқы легіне Солтүстік Америка, Еуропа, Африка, Азия және Аустралияның 23 елінен 49 ұйым енді. inVision U Орталық Азиядан таңдалған жалғыз жоғары оқу орны ретінде университеттердің болашағын қалыптастыруға бағытталған халықаралық қауымдастықта өңірдің атынан қатысады. Қатысушылар білім беру бағдарламаларын әзірлеу, студенттік тәжірибені жетілдіру және оқытудың жаңа тәсілдерін дамыту бағытында бірлесіп жұмыс істейді.

‍

Future Universities Alliance технологиялардың қарқынды дамуы, еңбек нарығының өзгеруі және сапалы әрі қолжетімді білімге сұраныстың артуы жағдайында жоғары білімнің рөлін қайта қарастырып жатқан жаңа және қалыптасқан университеттерді біріктіреді.

‍

Innovation Sandbox бағдарламасы аясында қатысушылар бір жыл бойы әлемнің түкпір-түкпірінен келген университет негізін қалаушыларымен, академиялық көшбасшылармен және білім беру саласындағы сарапшылармен тәжірибе алмасып, өзекті мәселелерді бірлесе талқылайды.

‍

inVision U үшін Альянсқа қосылу халықаралық үздік тәжірибелерді Қазақстан мен Орталық Азияның қажеттіліктеріне бейімдей отырып, заманауи білім беру моделін дамытуға деген ұмтылысты көрсетеді. Бағдарлама университетке әлемнің жетекші білім беру ұйымдарымен тәжірибе алмасуға, оқытудың жаңа тәсілдерін зерттеуге және академиялық бағдарламаларын одан әрі жетілдіруге мүмкіндік береді.

‍

‍

«Бүгінде әлемдегі университеттер студенттерді болашақтың қарқынды өзгерістеріне дайындаудың жаңа жолдарын іздеуде. Бұл үшін серіктестік, жаңа идеяларға ашықтық және білім берудегі жаңа тәсілдерді сынауға дайындық қажет. Future Universities Alliance бағдарламасының алғашқы қатысушыларының бірі болу inVision U-ге әлемдегі жетекші білім беру саласының жаңашылдарымен бірге дамуға және Орталық Азиядағы жаңа буын университетін құру тәжірибесімен бөлісуге мүмкіндік береді», – деді inVision U президенті Эндрю Вахтель.

‍

Innovation Sandbox бағдарламасы 2026 жылдың шілде айынан 2027 жылдың маусым айына дейін жалғасады. Бағдарлама тәжірибе алмасуға арналған тұрақты кездесулерді, академиялық көшбасшылармен жұмыс сессияларын және АҚШ-тың Солтүстік Каролина штатындағы Дарем қаласында өтетін жаһандық саммитті қамтиды.

‍

Future Universities Alliance – жоғары білімнің болашағын жаңаша қалыптастыруға ұмтылатын университеттерге арналған ашық халықаралық платформа. Альянс білім беру ұйымдары арасындағы ынтымақтастықты дамытып, студенттерді жылдам өзгеріп жатқан әлемнің сын-қатерлеріне дайындауға бағытталған жаңа оқыту модельдерін енгізуге ықпал етеді.

‍

«Білім беру – қоғамдағы оң өзгерістердің ең қуатты құралдарының бірі. Біз inVision U-ді Орталық Азияның әртүрлі өңірлеріндегі талантты жастарға бұрын қолжетімсіз болып көрінген мүмкіндіктерді ашу үшін құрдық. Біздің мақсатымыз – жай ғана жаңа оқу орнын ашу емес, болашақ көшбасшылар мен қоғамға пайда әкелетін өзгерістердің бастамашыларын тәрбиелейтін білім беру моделін қалыптастыру. Сондықтан білім берудің болашағын бірге іздейтін халықаралық университеттер қауымдастығының бір бөлігі болу біз үшін ерекше маңызды», – деді inDrive компаниясының негізін қалаушы және бас директоры, сондай-ақ inVision U бастамасының авторы Арсен Томский.

‍

inVision U-дің білім беру бағдарламаларына өтінім қабылдау 2026 жылғы 15 шілдеге дейін жалғасады.

Толық грантқа өтінімді университеттің ресми сайты арқылы онлайн тапсыруға болады.

‍

Серіктестер туралы

‍

inVision U – inDrive компаниясының негізін қалаушы әрі бас директоры Арсен Томскийдің білім беру бастамасы. Университет академиялық білімді нақты өмірдегі мәселелерді шешуге бағытталған тәжірибемен ұштастыратын тегін пәнаралық білім береді. inVision U жауапкершілігі жоғары, сыни ойлайтын және әрекет етуге дайын көшбасшыларды тәрбиелеуге бағытталған. Бағдарлама жас көшбасшыларға өз қауымдастықтарындағы мәселелерді шешуге және әділеттірек болашақ құруға қажетті білім мен дағдыларды, сондай-ақ халықаралық серіктестер мен кәсіби желілерге қол жеткізу мүмкіндігін береді.

‍

‍

Future Universities Alliance – оқыту мен жоғары білімді дамытуда инновациялық тәсілдерді енгізіп жүрген жаңа, дамып келе жатқан және қалыптасқан университеттерді біріктіретін халықаралық платформа. Duke University қолдауымен құрылған Альянс әлемнің түкпір-түкпіріндегі білім беру көшбасшылары арасындағы ынтымақтастық пен тәжірибе алмасуды қолдайды. Future Universities Alliance университеттерге білім беру саласындағы заманауи сын-қатерлерге бірлесіп жауап іздеуге және үздік тәжірибелерді студенттер мен қауымдастықтардың қажеттіліктеріне бейімдеуге көмектеседі. Толығырақ: futureuniversities.org 

‍